De Streektaolstried is weer streden. Nao een jaor oetstel gungen vrijdag negentien teams de stried an um de eerste plek.
Bron. De Schakel
De kwis, waorbij de vraogen almaol betrekking hebt op het Drèents en Drenthe, is speuld in een genoeglijke sfeer in MFC de Spil in Gasselternijveen. Streektaolambassadeur Jan Hartlief en één van de streektaolvrijwilligers, Roelie Meijering, hadden de kwis in mekaor zet en leidden de aovend. Een good verzörgde catering dreug der an bij dat het een geslaagde bijeenkomst weur. Dit waardeerden de deelnimmers, want zij waren almaol bliede dat der is weer wat organiseerd kun worden.

Nao aacht vraogenrondes, die under de bezielende leiding was van old Huus van de Taol-directeur Jan Germs, was der een winnaor. Het femilieteam ‘De Smitties’, een echt Aa en Hunze-team, wun met roem 53,5 punten de eerste pries. Ambassadeur Jan Hartlief reikte heur de wisselbokaol oet, die in 2020 ten deel vallen was an het team ‘De Broekstreek’.

De streektaolvrijwilligers van het Huus van de Taol in Aa en Hunze kunt terug kieken op een zeer geslaagde aovend. Ideeën en suggesties veur een neie stried bint alweer nuumd. Reken der alsvast maor op dat in 2023 weer een gedegen kwis in mekaor zet wordt.